رسائل عتاب للزوج المهمل باللهجة الجزائرية ستجعله يندم و يغير معاملته معك

مما لا شك فيه أن الزواج عالم مختلف عن عالم العزوبية، فهو مليء بالمغامرات و التجارب المتنوعة، و كذا يتخلل الزواج مشاكل بين الزوجين، و هذا أمر طبيعي و صحي للعلاقة الزوجية، و قد يتخلل أيضا الزواج نوع من الروتين الممل، و الذي يدفع بالزوج لإهمال زوجته، و عدم إظهار الحب و الإهتمام لها، مما يدفع بالزوجة بالاحباط و الدخول في دوامة من الشك و الحيرة.

و لهذا الغرض حضرنا لك مجموعة رسائل عتاب للزوج المهمل باللهجة الجزائرية ستجعله يندم و يغير معاملته معك، و ستؤثر هذه الرسائل على أحاسيس زوجك، و تلامسه في الصميم، ليشعر بخطأه، و يتدارك موقفه، و يعود إليك معتذرا و محملا بالورود و الهدايا.

رسائل عتاب للزوج المهمل باللهجة الجزائرية رقم 01:

سنبدأ بالرسالة الأولى من مجموعة رسائل عتاب قوية و مؤثرة باللهجة الجزائرية:

صباح الخير زوجي العزيز، واش دير، نتمنى تكون بخير و انت تقرا فهاذ الميساج، نظن راك تعرف مليح علاه بعثتلك فالوقت هذا، تعرف مليح المعاملة تعك معايا كفاه ولات موليتش الانسان اللي كنت نحبو و نعشق فيك، علبلك بروحك بلا ما نقلك بلي راك تبدلت عليا، و هملتني بزاف، و الاهمال تعك أثر على نفسيتي، لأنك زوجي و سندي فهاذ الحياة ،و المفروض انك انت اللي تخليني سعيدة و تنحيلي على بالي، علبلي باللي وقتك كامل فالخدمة، و نحسن عونك الضغط عليك بزاف، لكن نحبك ترجع سفيان اللي تزوجت بيه نهار اللول، سفيان اللي ميقدرش يرقد و يخليني زعفانة، سفيان اللي مستحيل يخليني نرقد و دمعتي على خدي، نحبك ترجع شفيان تاع زماااااان.....و نخليك مع ضميرك واش يقلك، سلام.

رسائل عتاب للزوج المهمل باللهجة الجزائرية رقم 02:

سننتقل للرسالة الثانية من رسائل عتاب وزعل للحبيب باللهجة الجزائرية:

صباح الخير،كيراك، نتمنى تكون بأفضل حال، ارسلتك هاذ الميساج باه نلوم عليك، نلومك على اهمالك ليا و قلة اهتمامك تحسب منيش عبد عايشة معاك فالدار، علبلك بروحك باللي رانا عدنا منتلاقاوش كامل، اما راك خدام، و لا مع صحابك، و حتى كي تروح للدار تضل عڨاب التلفون، معلبلكش كامل بيا و لا بولادك، تعرف هذا راك ظالمني بزاف، و تعرف باللي تحديت دارنا و كامل الناس باه تزوجت بيك، هذا هو جزائي؟ نحب نعرف علاه راك تعامل فيا بهاذ الطريقة، حتى كلمة نحبك جامي سمعتها من فمك، جامي تفكرتني بميساج و لا بكادو، و لا حتى بوردة، لهاذ الدرجة وصل الاهمال نتعك، ماكش حاس بيا و بالاكتئاب اللي درتهولي، راني تقست بزاف من ليجاست هذو، خاصة لانهم جاو منك نتا، صح عندك مشاغلك و خدمتك ، بصح انا ثاني مرتك و نسال فيك، شخال نزيد نصبر على هاذ الحالة؟

رسائل عتاب للزوج المهمل باللهجة الجزائرية رقم 03

و الآن مع الرسالة الثالثة من تشكيلة رسائل عتاب وحب في نفس الوقت باللهجة الجزائرية:

مساء الخير زوجي الغالي، و سندي في الحياة، نظن هاذ الكلمات كافية باه تفهم قصدي، فهمت روحك و لا مزال؟ حتى لوين و انا نستناك باه تتسقم و تعرف حقي عليك، اليوم نحب نفرغ قلبي، و نحبك تسمعني، علبلك بلي راك تبدلت 180 درجة، معدتش الانسان اللي حبيتو و عشقتو، معدتش الانسان اللي تحديت كامل الدنيا على جالو، و قلتلهم غير هو اللي نديه، وين اهتمامك و حنانك اللي وعدتني بيهم، وينهم الوعود و الأحلام اللي بنيتهملي، كنت تڨلي راح نخليك اسعد إنسانة في الدنيا، لكني نشوف العكس وليت اتعس انسانة في الدنيا، لهاذ الدرجة معندكش وقت، لهاذ الدرجة ماكش حاس بيا باللي راني نهار كامل فالدار وحدي، الغسيل و الطياب و تربية الذراري، راني مرتك و عندي حقوق عليك، جامي تفكرتني بتحويسة تديني تنحيلي على قلبي و تزهيني، راني حاسة روحي وحدي في هاذ الدنيا، وأنت اللي كنت سندي وليت ما تهتم حتى بحاجة تخصني، نتمنى تراجع حساباتك مليح و تعرف واش راك مضيع من حياتك.

رسائل عتاب للزوج المهمل باللهجة الجزائرية رقم 04

وصلنا للرسالة الرابعة من مجموعة رسائل عتاب للحبيب باللهجة الجزائرية:

زوجي الغالي بعثتلك هاذ الميساج باه نفرغلك قلبي، و نحكيلك الحاجة اللي راهي واجعتني منك، تعرف باللي كنا نحكيو ساعات وما نملوش، كانت التبسيمة متفارقش وجهي كي نحكي معاك، و كي نكون معاك، و حتى كي نخمم فيك المورال يطلعلي، بصح درك تبدلت عليا بزاااف، وليت ما تعرف حتى كي نكون زعفانة ولا كي نكون فرحانة، الإهمال هذا راهو يقتل فالعلاقة شوية بشوية. نحب نفهم علاش وليت هكذا؟ واش تبدل فيك؟ راني نحاول نفهم واش صرا بصح كل مرة نلقى روحي ضايعة في تساؤلات ما عندهاش جواب، اسكو كشما غلطت معاك، واشهي الحاجة اللي درتها غالطة هلاتك تجبد روحك عليا و تتبدل معايا، علبلي ضغط الخدمة و كلش و راك بعيد و تروح غير بالشهرين، بصح يلزم تحس بيا حتى انا، راك مخليني وحدي المسؤولية كامل فوق راسي، و نتا علبلك مهما واش بعدت راك خليت راجل موراك، لكن موش لهاذ الدرجة راني حتى انسانة و نحس، و الله عدت نغير كي نشوف نسا رجالهم مهتمين بيهم و مقلشينهم، و تعرفني بلي منيش مادية و مراعية ظروفك في كلش، لكن انت ثاني يلزم تحس بيا و تحسن معاملتك ليا، لأني معنديش غيرك فالدنيا هذي.

رسائل عتاب للزوج المهمل باللهجة الجزائرية رقم 05

و الآن مع الرسالة الخامسة من تشكيلة مسجات عتاب للحبيب باللهجة الجزائرية:

حبيبي الغالي وسيم،زوجي و اب ولادي، و تاج راسي، رسلتلك هاذ الميساج اليوم لأني مقدرتش نواجهك، و منحبش نداوس معاك، بصح كاين حاجات في قلبي لازم نخرجهم سينو ننضر، و ننضر بزاف ثاني، الحاجات اللي ضروني هوما اهمالك ليا، و ماشي سهل عليا نشوف روحي مهملة، خاصة من جيهتك نتا، خطكش تعرف انت واش في حياتي، و تعرف التضحيات اللي قدمتهم باه نتزوج بيك، و نكون معاك تحت سقف واحد، و ذرك تجازيني بهاذ الطريقة؟

تعرفني باللي منيش مادية، و تعرف مليح باللي اهتمام صغير يفرحني، بصح وليت نشوف غير برود وكلام جاف و جارح و بعد و اهمال، وين راحت العشرة والحب اللي كان بيناتنا؟ وين راحو الوعود اللي وعدتني بيهم، و الحياة الوردية اللي رسمتهالي، راني وليت نحتاجك و منلقاكش و انت اللي مفروض يسموك سندي في حياتي و أبي الثاني، لكن للأسف نظن كلش راه مجرد خيال في عقلي انا وبس،نحتاجك تحس بيا كيما زمان، تهتم بي بلا ما نطلب، و ترجع وسيم اللي عشقتو و حبيتو و درت المحال باه نكون معاه، و ذرك نخليك مع ضميرك واش يقلك.... سلام.

رسائل عتاب للزوج المهمل باللهجة الجزائرية رقم 06

و الآن مع الرسالة الأخيرة من مجموعة رسائل باللهجة الجزائرية للحبيب:

صباح الخير زوجي حليم، يا اعز الناس، يا أعز الناس اللي تغير علي فجاة و بدون سبب، توقعت كامل الناس يدورو عليا إلا نتا، عمري متوقعتها منك، و عمري متوقعت تخرجلي بهاذ الخرجة، تعرف مليح علاه راني نقول هك، إيه هذاك هو التخمام اللي فراسك بعد ...

تعرف اهمالك دمر فيا كلش، رجعت انسانة بدون وعي، بدون مشاعر و لا أحاسيس، رجعت نخمم غير وكته يجي الليل نحط راسي عالمخدة باه نشكيلها همي، و نفرغلها دموعي، و فالصبحة نفيق بآمال جديدة، نقول اليوم راح يكون مختلف، اليوم يفيق حليم و يعرف غلطتو، و يرجع حليم تاع زمان، بصح كي يطلع النهار نلقى باللي حاجة ماتبدلت، نلقى نفسي في نفس الروتين، نفس البرود، نفس الاهمال من جيهتك، وليت نحس روحي غير مهمومة وعندي شريك ما يشاركش في همومي ولا أفراحي، واش ذنبي نعيش في علاقة كلها إهمال وتجاهل؟ نحبك تراجع مليح روحك، و تشوف شحال راك مقصر في حق زوجتك و حبيبتك و شريكتك فالحياة، و راني نستنى ردك ....زوجتك المخلصة إلهام.

تعبر هذه الرسائل التي تمثل: رسائل عتاب ولوم، رسائل عتاب للحبيب لعدم الاهتمام، كما يمكن استخدامها أيضا كأنها رسائل عتاب للزوج الذي يهين زوجته، حيث تعبر هذه الرسائل بعمق عن أحاسيس الزوجة التي تملك زوجا مهملا، غير مهتم و لا مبال بمشاعر زوجته.

آنستي

رسائل عتاب للزوج المهمل باللهجة الجزائرية ستجعله يندم و يغير معاملته معك